நாயகன் -காட்ஃபாதர்: ஒரு ஒப்பீடு

நாயகன் படத்தை பல தடவை பார்த்துவிட்டேன். காட்ஃபாதரின் மூன்று பாகங்களும் சமீபத்தில் கிடைக்க, மூன்றையும் பார்த்து விட்டேன். நாயகன் காட்ஃபாதரின் அப்பட்டமான காப்பி என்பது பலபேரால் வைக்கப்படும் ஒரு குற்றச்சாட்டு. இதில் எந்தளவுக்கு உண்மை இருக்கிறது என்பதற்காகவே காட்ஃபாதரின் மூன்று பாகமும் கிடைக்காமல் காட்ஃபாதர் பார்ப்பதில்லை என்று காத்திருந்தேன். இரண்டாவது பாகம் இணையங்களில் கிடைக்காமல் கொஞ்சமே படுத்தி எடுத்துவிட்டது. இப்போ காட்ஃபாதரையும், நாயகனையும் என்னால் ஓரளவுக்கு ஒப்பிட முடியும் என்ற நம்பிக்கை வந்திருக்கிறது. இரண்டு படங்களையும் நான் புரிந்து கொண்ட கோணத்திலிருந்து இந்த ஒப்பீட்டை எழுதுகிறேன்.

படம்-1: காட்ஃபாதர் (மார்லன் ப்ராண்டோ), நாயகன் (கமல்)

நாயகன் சிறுவயதிலேயே குடும்பத்தை இழந்து, ஒரு கொலை செய்துவிட்டு சொந்த ஊரைவிட்டு வேறு ஊருக்குப் போகும் சிறுவன் ஒருவன் எப்படி ஒரு நகரத்தையே கலக்கும் தாதா ஆகிறான் என்பதைப் படம்பிடித்துக் காட்டுகிறது. காட்ஃபாதரின் பிரதான கதைக்களம், காலேஜ் படித்த, அமெரிக்காவுக்காக ராணுவ சேவையாற்றிய, தாதாக்களான தகப்பன் மற்றும் தமையனால் ஒரு நல்ல குடிமகனாகத் தயார் செய்யப்படுகிற, மனம் மயக்கும் அழகை உடைய ஒரு இளைஞன், எவ்வாறு தீவிரமான தாதாவாக உருவாகிறான், அந்த மாற்றத்தால் அவனும் அவன் குடும்பமும் சந்திக்கும் பிரச்சினைகள் என்ன என்பதேயாகும். இதில் ஒரு துணைக்கதையை எடுத்துக் கொண்டு இந்தியாவுக்கு ஏற்ற மாதிரி மாற்றிச் சொன்ன படம்தான் நாயகன். அதாவது காட்ஃபாதர் இரண்டாம் பாகத்தில் வரும் ஒரு துணைக்கதையின் மெல்லிய தழுவல் என்றுதான் நாயகனைச் சொல்லலாம்.

படம்-2 : மைக்கல் கோர்லியோன் (அல் பசினோ) மற்றும் காதல் மனைவி கே அடம்ஸ் (டயான் கீற்றன்).

முதலில் ஆஸ்கர் எந்த வகையில் ஒரு பாத்திரத்தைப் பிரதான பாத்திரமாகக் கொள்கிறது என்பதில்தான் சிக்கல். காட்ஃபாதர் முதல் பாகத்தில் விட்டோ கோர்லியோன் (மார்லன் பிராண்டோ) பாத்திரத்தைவிட, திரையில் ஆதிக்கம் செலுத்துவது மைக்கல் கோர்லியோன் (அல் பசினோ) பாத்திரமே. ஆனால், ஆஸ்கர் மார்லன் பிராண்டோவுக்கு Best Actor in a Leading Role என்ற விருதைக் கொடுத்த ஒரே காரணத்துக்காக காட்ஃபாதர் கதையே மார்லன் பிராண்டோவின் ரோலை அடிப்படையாகக் கொண்டது என்பதாகத்தான் எம்மில் பலர் அறிந்து வைத்திருக்கிறோம். காட்ஃபாதர் இரண்டாம் பாகத்தில் ஒரு துணைக்கதையாக இத்தாலியிலிருந்து சின்னப்பையனாக வரும் விட்டோ அண்டோலினி என்ற சிறுவன் எப்படி விட்டோ கோர்லியோன் என்கிற தாதாவாக வளர்கிறான் என்று ஒரு துணைக்கதை போகும். அதன் தழுவல்தான் நாயகன் என்பது என் சிற்றறிவுக்கு தென்படும் கோணம்.

படங்கள்-3 & 4: காட்ஃபாதர் மற்றும் நாயக்கராக அல் பசினோ மற்றும் கமல்

நாயகன் பற்றி வைக்கப்படும் சில குற்றச்சாட்டுக்களை ஒப்புக் கொள்கிறேன். சில காட்சிகளை அப்பட்டமாக சுட்டிருக்கிறார்கள். வேலு நாயக்கர் (கமல்) மனைவிக்கு ஈமக் கிரியைகள் செய்யும்போது அவரது எதிரிகளை ஆட்களை வைத்துத் தீர்த்துக் கட்டுவார். அதேபோல் காட்ஃபாதர் முதல் பாகத்தில் மைக்கல் கோர்லியோனின் தங்கையின் பிள்ளைக்கு பேப்டிஸம் நடக்கும் போது அவரது எதிரிகள் தீர்த்துக்கட்டப்படுவதாக ஒரு சீன் இருக்கிறது. அதே போல் விட்டோ கோர்லியோனின் மூத்த மகனின் மரணத்தின் பின் அவர் இறந்த உடலைப் பார்க்க வருவது, பேரனுடனான அவரது பிணைப்பு போன்ற காட்சிகளிலும் நாய்கன் காட்ஃபாதரை ரொம்பவே ஒத்துப்போகிறது. தாதாயிசம் பிடிக்காமல் அங்கே மைக்கல் கோர்லியோனின் மனைவி பிரிந்து போவார், இங்கே வேலு நாயக்கரின் மகள் பிரிவார். அதேபோல் கமல் வெற்றிலையை அதக்கியபடி பேசுவதை மார்லன் பிராண்டோவின் மேனரிசத்தோடு ஒப்பிட்டுப் பார்க்கலாம். மற்றபடி பெரியளவில் நாயகனை காட்ஃபாதரின் அப்பட்டமான காப்பி என்று சொல்ல முடியாது.

படம்-5: வேலு (கமல்) மற்றும் காதல் மனைவி நீலா (சரண்யா)

காட்ஃபாதரும், நாயகனும் வேறுபடுவது இரண்டு முக்கிய இடங்களில். ஒன்று, மைக்கல் கோர்லியோன் என்றாவது தன் நடவடிக்கைகளை சட்டபூர்வமாக்க முயல்வார். ஆனால் மறுபடி மறுபடி தோற்றுப்போவார். இதனால் அவர் தன் குடும்பத்தில் எதிர்நோக்கும் பிரச்சினைகளும், யாருமேயில்லாமல் செத்துப் போவதும்தான் காட்ஃபாதரின் இறுதிமுடிவு. ஆனால், நாயகனின் முடிவுக்கும் இதுக்கும் பெரியளவு சம்பந்தமில்லை. கோட்பாட்டு ரீதியாக சம்பந்தம் இருப்பதாக வேண்டுமானால் வாதிடலாம். சினிமா ரீதியாக இல்லை. காட்ஃபாதருக்கும், நாயகனுக்குமான மிகப் பாரிய வித்தியாசம் இரு தாதாக்களின் கொள்கை அல்லது தொழில் தர்மம்.

படம்-6: வேலு கடத்தல் செய்யும் டெக்னிக்

காட்ஃபாதரில் வீட்டோ கோர்லியோன், மைக்கல் கோர்லியோன் இருவருமே போதை மருந்து பிஸினஸ்சில் ஈடுபடுவது இல்லை என்பதைக் கொள்கையாக வைத்திருந்தார்கள். இந்தக் கொள்கைதான் எப்படியோ வாழ்வேண்டிய மைக்கலை தாதாவாக மாற்றுகிறது. ஆனால் வேலு நாயக்கர் 'நாலு பேர் நல்லாயிருக்கணும்னா எதுவும் தப்பில்லை' என்று சொல்லி போதை மருந்து (அந்த சரக்கு போதை மருந்தாகத்தான் இருக்க வேண்டும்) கூடக் கடத்துவதாக ஒரு காட்சி வந்தது ஞாபகம் இருக்கலாம். இதிலேயே படங்களுக்கிடையே வேறுபாடு வருகிறதே. நாயகனில் போதை மருந்து கடத்த கமல் உபயோகிக்கும் டெக்னிக் உண்மையிலேயே இன்னொரு ஆங்கிலப் படத்தில் வந்தது. ஆனால் அதே டெக்னிக் பல கடத்தல் மன்னர்களாலும் பயன்படுத்தப் பட்டது என்பதால், அதை எந்த இயக்குனரும் உரிமை கோர முடியாது. அப்புறம் 'நாயக்கர் மாமா' என்றபடி சுடும் அந்த மனநலம் குன்றிய பையன்/மனிதன் (டின்னு ஆனந்த்) கதாபாத்திரத்தை காட்ஃபாதர் முழுக்கத் தேடியும் என்னால் கண்டுபிடிக்க முடியவில்லை. யாராவது கண்டு சொல்வீர்களா?

படங்கள்- 7: நான் சொன்ன அந்த காட்ஃபாதரில் இல்லாத பாத்திரப் படைப்பு. மனவளம் குன்றிய மனித்னாக டின்னு ஆனந்த்.

ஆக, எனக்கு இருக்கிற கொஞ்ச நஞ்ச சினிமா அறிவுக்கு எட்டியபடி, நாயகனை காட்ஃபாதர் படத்தின் மெல்லிய தழுவல் என்று சொல்வேனே தவிர அப்பட்டமான காப்பி என்று சொல்லமுடியாது. சில காட்சிகளை மணிரத்னம் உருவியிருக்கிறார் என்பது அப்பட்டமாகத் தெரிகிறது. அதற்காக நான் மேலே சொன்ன அந்த மனநலம் குன்றிய பாத்திரம், கமல்-சரண்யா காதல், சிறுவயது வேலு நாயக்கரை வளர்க்கும் அந்த முஸ்லீம் பெரியவர், தாராவிக் குப்பம், அந்தக் குப்பத்தைக் காலி செய்ய முயலும் பணக்காரன், கெட்ட இன்ஸ்பெக்டரை வதம் செய்யும் நாயகன், சீழ் பிடித்த சமூகம் பற்றி நாயகன் உணரும் காட்சிகள், நாயகனின் பரிமாண மாற்றங்கள், நாஸரின் பாத்திரம், கடைசிக் காட்சிகள் போன்றவற்றில் நாயகன் காட்ஃபாதரை விட்டு ஓரளவுக்காவது விலகி, கதைக்களத்துக்கு ஏற்றபடி படைக்கப்பட்டிருப்பதை ஒப்புக்கொள்ளத்தான் வேண்டும்.

ஒரு கேள்வி: போதைமருந்தை ரப்பரோடு சேர்த்துக் கட்டி கடலில் போட்டு கடலில் ரோந்து போகும் அதிகாரிகளிடமிருந்து ஒளிப்பது போன்ற ஒரு காட்சி நாய்கனில் வருகிறது. இதே ஐடியாவைப் பயன்படுத்தி போதை மருந்து கடத்தும் ஒரு காட்சி அதற்கு முன்னமே ஒரு புகழ் பெற்ற, சிறந்த க்ரைம் த்ரில்லஎ என்று புகழப்படும் ஒரு படத்தில் வந்தது. அது எந்தப் படம்? (க்ளூ: அந்தப் படத்தின் நாயகன், காட்ஃபாதர்-2 வில் நடித்ததுக்காக Best Actor in a Supporting Role என்ற விருது வென்றவர்)

த டிபார்டட் (The Departed)

ஒரு மாநிலத்தின் கட்டுக்கோப்பான போலீஸ் படை. அதேபோல் கட்டுக்கோப்பான ஒரு மாஃபியா கூட்டம். போலீஸ் மாஃபியா கூட்டத்துக்குள் தங்கள் உளவாளி ஒருவனை அனுப்புகிறார்கள். அதேவேளை மாஃபியா கூட்டத்தலைவன் தான் சிறுவயதில் இருந்தே தயார் பண்ணிய ஒருவனை அந்த மாநிலப் போலீஸின் கூடாரத்துக்குள் அனுப்புகிறான். ஒரு கட்டத்தில் இரு பகுதி ஆட்களுக்கும் தங்களுள் ஒரு எட்டப்பன் ஊடுருவியிருப்பது தெரியவருகிறது. பிறகென்ன இருவரின் உண்மையான அடையாளங்களை வெளிக்கொண்டுவர இரு பகுதியும் நடத்தும் போராட்டம்தான் ‘த டிபார்டட்' படத்தின் கதை.

அமெரிக்காவின் Massachusetts மாநிலத்தில் உள்ள ஒரு Irish மாஃபியாக் கூட்டத்தின் தலைவன் ஃபிராங் காஸ்டல்லோ (Frank Costello), இளவயதிலேயே கொலில் சுல்லிவன் (Colin Sullivan) என்ற சிறுவனை மாஃபியாவுக்கு அறிமுகப்படுத்துகிறார். பெற்றோரை இழந்த அந்தச் சிறுவனைக் கல்விகற்கவைத்து அந்த மாநிலப் போலீஸ் படையில் சேர்த்துவிடுகிறார், தன்னுடைய உளவாளியாக இருக்கும்படி. அவன் ஒரு Detective ஆக பதவி உயர்த்தப்படும் அதேநாள் வில்லியம் காஸ்டிகன் (William Costigan) என்ற இளைஞன் போலீஸ் வேலை தேடி வருகிறான். போலீஸ் அகடமியைக் கூட சரியாக முடிக்காத, மாஃபியாவுடன் இரகசிய தொடர்புகளைக் கொண்ட ஒரு குடும்பத்து இளைஞனான இவனை போலீஸில் சேர்க்க முடியாது என சர்ஜன் டிக்னிம் (Sergeant Dignim) அவமானப்படுத்துவது போல் பேசினாலும், அவரும் கேப்டன் குயினினும்(Captain Queenan) இந்த இளைஞனை காஸ்டல்லோ குழுவுக்கு உளவாளியாக அனுப்புகின்றார்கள். இரு உளவாளிகளும் தங்கள் வேலையை ஒழுங்காகச் செய்கின்றனர்.

காஸ்டல்லோவின் ரகசிய மாஃபியா வேலைத்திட்டங்கள் பற்றி போலீஸ்சுக்கு தெரிய வருகிறது. போலீஸின் திட்டங்கள் காஸ்டல்லோவுக்கு தெரிய வருகிறது. ஆக, இரு முகாமகளிலும் எதிரி உளவாளி இருக்கிறான் என்பதை உணர்ந்து கொள்கிறார்கள். இதற்கிடையில் காஸ்டிகனும், சுல்லிவானும் ஒரே பெண்ணோடு கிட்டத்தட்ட பட்டும் படாம்லும் உறவில்வேறு இருக்கிறார்கள். இரு முகாம்களிலும் பதட்டம் அதிகரிக்கிறது. கேப்டன் குயினின்தான் காஸ்டல்லோவின் உளவாளி என்பதாக சுல்லிவான் போலீஸிடம் சொல்ல அதனால் ஏற்படும் குழப்பத்தில் காஸ்டல்லோ ஆட்களால் குயினின் கொல்லப்படுகிறார். சார்ஜன் டிக்னிம் போலீஸிலிருந்து கட்டாய லீவு கொடுத்து அனுப்பப்படுகிறார். காஸ்டிகன் போலீஸ் உளவாளி என்று தெரிந்த இருவரையுமே தன் வழியிலிருந்து நீக்கிவிடும் காஸ்டல்லோவின் உளவாளியான் சார்ஜன் சுல்லிவன், காஸ்டிகணை காஸ்டல்லோவுக்கு அடையாளம் காட்டினானா? இல்லை காஸ்டிகன் இவனை அடையாளம் காட்டினானா? என்பதையெல்லாம் படம் பார்த்துத் தெரிந்து கொள்ளுங்கள்.

காஸ்டிகனாக லியனார்டோ டிகேப்ரியோ (Leonardo DiCaprio), கொலின் சுல்லிவானாக மேட் டேமன் (Matt Damon), ஃப்ராங் காஸ்டல்லோவாக ஜேக் நிக்கல்சன் (Jack Nicholson), கேப்டன் குயினினாக மார்டின் ஷீன் (Martin Sheen), சர்ஜன் டிக்னிம்மாக மார்க் வால்பர்க் (Mark Wahlberg) ஆகியோர் முக்கிய பாத்திரங்களில் நடித்த இப்படத்தை புகழ்பெற்ற ஹாலிவூட் இயக்குனர் மார்டின் ஸ்கொர்செசி (Martin Scorsese) இயக்கி 2006ம் ஆண்டு வெளியான இப்படம் பலத்த வரவேற்பைப் பெற்றது. சிறந்த படம், சிறந்த இயக்குனர், சிறந்த படத்தொகுப்பு, சிறந்த தழுவல் திரைக்கதை (Adopted) ஆகிய பிரிவுகளில் ஆஸ்கர் வென்றது. சிறந்த துணைநடிகர் விருதுக்கு மார்க் வால்பர்க் பரிந்துரைக்கப்பட்டார். அதே வருடம் வெளியான Blood Diamond படத்திற்காக, இப்படத்தில் நடித்த டிகேப்ரியோ சிறந்த நடிகர் விருதுக்கு பரிந்துரைக்கப் பட்டிருந்தார். இருந்தும் The Last King of Scotland என்ற படத்தில் இடி அமீனாக நடித்த Forest Whitaker இடம் தோற்றார்.

இப்படத்தின் இயக்குனர் ஹாலிவூட்டில் பல வெற்றிப்படங்களைக் கொடுத்தவர். Taxi Driver, Raging Bull, Good Fellas, Cape Fear, The Aviator போன்ற நல்ல படங்களைக் கொடுத்தவர். பல்முறை இந்த விருதுக்கு பரிந்துரைக்கப்பட்டும் வெல்ல முடியாமல் போனவர். கடைசியாக இந்தப் படம் மூலம் தன்னுடைய 65ம் வயதில், சினிமாவில் நுழைந்த 37வருடங்களின் பின் விருதை வென்றெடுத்தார். இந்தப் படம் உண்மையில் ஒரு ஹாங்காங் படத்தின் ரீ-மேக். 2002ல் Andrew Lau இயக்கிய Infernal Affairs என்ற படத்தின் ரீ-மேக் இது. விருது பெற்ற போது ‘அந்த அற்புதமான ஆசிய சினிமாவுக்கு' நன்றி என்று பெருந்தன்மையோடு கூறினார் ஸ்கொர்செசி. டி கெப்ரியோவின் வித்தியாசமான முகங்கள் வெளிவரத் தொடங்கிய காலத்தில் வந்த ஒரு அழகான த்ரில்லர் படம் ‘த டிபார்டட்'.

இதுபோன்ற படங்களை எந்த மொழியிலும் ரீ-மேக் செய்யலாம். மோசமான சண்டைக் காட்சிகள், பாடல் காட்சிகள் இவற்றைத் தவிர்த்து சிறுசிறு மாற்றங்களோடு தமிழில் எடுத்தால்கூட அற்புதமாக ஓடும். என்ன, சில சில கேரக்டர்களை இயக்குனரின் விருப்பப்படி செய்யக்கூடிய, ஆனால் தனக்கென்று தனித்துவமான ஒரு நடிப்புத் திறண் கொண்ட இரு இளம் நடிகர்கள் தேவை. ஒரு குணசித்திர ஜாம்பவான் தேவை (இரு முறை ஆஸ்கர் வென்ற ஜேக் நிக்கல்சன் இப்படத்தில் வில்லன்) இப்போ இரண்டு ஹீரோ படங்களிலும் நடிக்கும் துணிவு சூர்யாவிடம் மட்டுமே இருக்கிறது. அதேவேளை இயக்குனர் சொல்வதைச் செய்யும் நல்ல பழக்கமும் அவரிடம் மட்டுமே இருக்கிறது. எனவே இந்தக் கதை இப்போதைக்கு தமிழ் சினிமாவில் வராது. மற்ற இந்திய மொழிகளில் இதே படத்தை நேர்த்தியாக எடுக்குமளவுக்கு டெக்னீஷியன்கள் இல்லை என்பது என் கருத்து.

ஷிண்ட்லர்ஸ் லிஸ்ட்

சில படங்களைப் பார்த்தால் உறசாகம் பொங்கும். சில படங்களைப் பார்த்தால் கண்ணீர் திரளும். சிலபடங்கள் கவிதையாய் கிறங்கடிக்கும். சில படங்கள் கவலை மறந்து சிரிக்கவைக்கும். மிகச்சில படங்கள் ஏன்தான் பார்த்தோமோ என்று நினைக்க வைக்கும். அப்படி ஏன் பார்த்தோம் என்று நினைக்க வைக்கும் படங்களை இருவகைப் படுத்தலாம். ஒன்று விஜய், விஷால், சிம்பு வகையறாக்களின் படங்கள். இதுக்கெல்லாம் டிக்கட் எடுத்து, இரண்டரை மணிநேரம் செலவழித்தோமா என்று கடுப்பேத்தக்கூடிய படங்கள். மற்ற வகை, உண்மையாயே உள்ளத்தைப் பாதித்து ஒரு இனம்புரியாத பய உணர்வையோ, அருவருப்பையோ ஏற்படுத்தக் கூடியவை. அப்படிப்பட்ட இரண்டாவது வகைக்குள் அடங்கும் படம்தான் 1993ஆம் வருடம் ஸ்டீஃபன் ஸ்பீல்பெர்க் (Steven Spielberg) இயக்கி வெளியான Schindler's List.

இரண்டாம் உலகப்போர் ஆரம்பமாகியிருந்த காலப்பகுதியில் நடந்த உண்மைச் சம்பவத்தை அடிப்படையாக வைத்து எழுதப்பட்ட ‘ஷிண்ட்லர்ஸ் லிஸ்ட்' என்ற நாவலை மையமாக வைத்து ஸ்பீல்பெர்க் இயக்கிய படம்தான் இது. 7 ஆஸ்கர் விருதுகளை வென்ற இப்படமானது ஸ்பீல்பெர்க் இயக்கிய படங்களிலேயே அது உன்னதமானது என்று புகழப்படுவது. அடொல்ஃப் ஹிட்லரின் நாஸிகளின் ஆட்சிக்காலத்திலே ஹிட்லரின் ராணுவ அதிகாரிகள் போலந்து நாட்டிலிருந்த யூத இன மக்களுக்கு நிகழ்த்திய கொடுமைகளும், அந்தக் கொடுமைகளிலிருந்து கிட்டத்தட்ட 1200 யூதர்களை தன் தொழிலாளர்கள் என்று சொல்லிக் காப்பாற்றிய ஒஸ்கர் ஸிண்ட்லர் என்பவரது கதையும்தான் படத்தின் அடிநாதம். பலபேர் இப்படத்தைப் பார்த்திருப்பீர்கள், பலர் கேள்விப்பட்டிருப்பீர்கள். கதையை மறுபடி சொல்லி போரடிக்காமல், படம் என்னை ஏன் பாதித்தது என்று சொல்வது பரவாயில்லை என்பது என் எண்ணம்.

ஸிண்ட்லர் கதாபாத்திரம் உண்மையிலேயே என்னைப் பாதித்தது. Liam Neeson அந்தப் பாத்திரத்தை ஏற்றுக்கொண்டிருந்தார். அவரது யூத இன கணக்காய்வார் Itzak Stern ஆக ‘காந்தி' புகழ் Ben Kingsly. ஆரம்பத்தில் வர்த்தகத்தில் பெரியளவில் வெற்றி பெறாதவரான ஸிண்ட்லர் யூதர்களின் கறுப்புச் சந்தை முதலீடுகளை ஸ்டேர்ன் மூலம் பெறுகிறார். ராணுவ முதலீடுகளும் கிடைக்கின்றன. ஏழை யூதர்களை தன்னுடைய கம்பனியில் சேர்த்துக்கொள்கிறார், குறைந்த செலவில் உற்பத்தியைக் கூட்டுவதற்காக. ஸ்டேர்ன் சில யூதர்களை இப்படியாக இவரது கம்பனிக்குள் சேர்த்துக் காப்பாற்ற முயல்கிறார். ஸிண்ட்லரிடம் பணம் சேர்கிறது. ஸிண்ட்லர் நேரடியாகப் பார்க்கும் சில நாஸி படைகளின் கொடுமைகள், ஸ்டேர்னின் மேல் அவர் வைத்திருக்கும் வித்தியாசமான அன்பு எல்லாம் சேர்ந்து கடைசியில் ராணுவத்துக்கு லஞ்சம் கொடுத்து உற்பத்தி இல்லாத தொழிற்சாலையில் யூதர்களைக் காப்பாற்றும் அளவுக்கு இவருள்ளே மனமாற்றம் ஏற்படுகிறது. கடைசிக்காட்சியில் ‘இந்தக் காரை வித்து இன்னும் 10 பேரைக் காப்பாற்றியிருக்கலாமே, இந்த பேட்ஜ் ஒருவரைக் காப்பாற்றியிருக்குமே' என்று உடைந்து அழும்போது நம் கண்கள் பனிப்பதை தவிர்க்க முடியாது.

முழுக்க முழுக்க கறுப்பு வெள்ளைப் படத்தில் இரண்டே இரண்டு சம்பவங்களில் மட்டுமே நிறம் தென்படும். ஒன்று நாஸிப்படைகள் அட்டகாசம் செய்வதைத் தூரத்திலிருந்து பார்க்கும் ஸிண்ட்லர் ஒரு சிவப்பு கோட் போட்ட சிறுமியைக் காண்பார். பிறிதொரு சந்தர்ப்பத்தில் சில பிணங்கள் எரிக்கப்படும்போது அதே சிறுமியின் பிணத்தை அதே சிவப்புக் கோட்டுடன் காண்பார். நாஸிகளின் அட்டகாசத்தைக் கண்டு ஸிண்ட்லருள் இருந்த வியாபாரியை மீறி மனிதம் வெளிப்பட ஆரம்பிப்பது இந்தக் காட்சிகளில்தான். அதே போல் யூதர்களை தன்னுடைய தொழிற்சாலையில் பிரார்த்தனை செய்ய அனுமதிப்பார் ஸிண்ட்லர். அவர்கள் பிரார்த்தனைக்காகக் கொளுத்தும் மெழுகுவர்த்தி மட்டும் நிறத்தில் இருக்கும். 'ஒரு நம்பிக்கை ஒளிக்கீற்றைக் காட்டும் குறியீடு அது' என்கிறார் இயக்குனர். இந்த இரண்டு காட்சிகளும் கவிதையாகச் செதுக்கப்பட்ட காட்சிகள்.

என்னை மோசமாகப் பாதித்த காட்சிகள் நாஸிப்படையின் அட்டகாசம் சம்பந்தமான காட்சிகள். ஒரு ஒற்றைக்கைக் கிழவரை 'நீ பனி வாரக் கூட லாயக்கில்லை' என்று சுட்டுக்கொல்வார்கள். ஒரு பொறியியல் தெரிந்த பெண் கட்டாய வேலைத்தலம் ஒன்றில் நடக்கும் கட்டிடப் பணியில் அஸ்திவாரம் பற்றிக் கருத்துச் சொன்ன ஒரே காரணத்துக்காக சுடப்படுவாள். நாஸிப் படை அதிகாரியான ஏமொன் கோத் (Amon Goth), தன்னுடைய காதலியுடன் உறவு கொண்டுவிட்டு ரிலாக்ஸ் செய்வதற்காக வீட்டு மொட்டைமாடியில் நின்றபடி தூரத்தில் வதைமுகாம்களில் வேலைசெய்யும் அப்பாவி யூதர்களைக் குரூரமாகச் சுட்டுக் கொல்வான். இதை எல்லாம் பார்க்கும் போது, மீண்டும் இப்படி ஒரு இனவதைக் காலம் வந்தால் என்னாகும் என்று நினைத்து நெஞ்சு பதறுவது உண்மையான உண்மை.

இந்தப் படத்தின் ஒரு காட்சியில் ஒரு குளியலறையை, விஷ வாயு அறையாக அதனுள் நிர்வாணப்படுத்தப்பட்டு அடைக்கப்படும் பெண்கள் எண்ணிப் பயப்படுவார்கள். அந்தக் காட்சியை ஸ்பீல்பெர்க் தன்னுடைய படத்திலிருந்து அப்படியே உருவி விட்டதாக செக் நாட்டு இயக்குனர் Juraj Herz என்பவர் குற்றம் சாட்டியிருந்தார் என்பது குறிப்பிடத்தக்கது. ஆனால், 1983லிருந்தே ஸ்பீல்பெர்க் இந்தப் படத்தை தயாரிக்க முயன்று, தன் முதிர்ச்சியின்மையக் காரணம் காட்டி, படத்தை இயக்க வேறு இயக்குனரைத் தேடி கடைசியாக 1993ல் (பத்து வருடம் கழித்து) இயக்கினார். அந்தவகையில் ஸ்பீல்பெர்க்குக்கு ஒரு ராயல் சல்யூட் போடலாம், காலம் கழித்தும் காவியமாய் ஒரு படம் தந்தற்கு.

பி.கு: படம் கொஞ்சம் நீளம். 3 மணித்தியாலம் 15 நிமிடம் ஓடும். படத்தை முழுமையாகப் பார்க்க கொஞ்சம் பொறுமை தேவை. என்னதான் இந்தப் படத்தின் Genre Dramaவாக இருந்தாலும், இனம்புரியாத படபடப்பு தோன்றுவதென்னவோ உண்மை.

அப்போ நான் நல்ல பிள்ளை.

2004 இல் முதல் தரம் உயர்தரப் பரீட்சை எழுதிவிட்டு, இலங்கை பூரா ஒரு சுற்றுலா போவது என்று முடிவெடுத்தோம். அப்போதான் கருணா விவகாரம் வெடித்திருந்தது. அதனால் மட்டக்களப்பு தவிர எங்கு வேண்டுமானாலும் போங்கள் என்றார் அப்பா. நான், மஜிந்தன், நித்து, கபிலன், அரவிந்தன், சிவரூபன், சிறிகாந்தன், 'ப்ளம்ஸ்' மயூரன், 'மக்கி' அரவிந்த், கஜன், வாகீசன், கமலகோபன் ஆகிய 12 பேரோடு ஒரு ட்ரைவர் மற்றும் சிங்களம் பேசும் ஒரு அண்ணா (தமிழர்தான்) புறப்பட்டோம். புறப்பாட்டுக்கு முன் 'மக்கி' அரவிந்தின் அப்பா, மக்கி எனப்படும் மகேந்திரன் மாஸ்டர் ஒரு பிரச்சினை கிளப்பி, அதை பொய்யெல்லாம் சொல்லி சமாளித்துவிட்டு அந்தச் சுற்றுலா கிளம்ப போதும் போதும் என்றாகிவிட்டது. அந்த இன்பச்சுற்றுலா பற்றி, நடந்த சுவையான ஊடல்கள், கூடல்கள் பற்றியெல்லாம் என் பின்னைய பதிவுகளில் என்னிடமுள்ள படங்களோடு தருகிறேன். ஆனால் இந்தப் பதிவு, அந்தச் சுற்றுலாவின் இறுதிப் புள்ளியான சிறிலங்கா தலைநகர் கொழும்பில் நடந்த ஒரு சம்பவத்தைப் பற்றியது.

யாழ்ப்பாணம் நெல்லியடியில் புறப்பட்ட சுற்றுலா, திருகோணமலை, கண்டி, நுவர-எலிய, கதிர்காமம் எல்லாம் போய், கடைசியாகக் கொழும்பு வந்து, அங்கிருந்து மீண்டும் யாழ்ப்பாணம் திரும்புவது என்பதாக ஏற்பாடு. ஏற்பாட்டின் படி கொழும்பு வந்தோம். வந்ததுதான் தாமதம், படம் பார்க்கப் போக வேண்டும் என்று நச்சரிக்க ஆரம்பித்துவிட்டார்கள் பொடியன்கள். எங்களோடு மற்ற இடமெல்லாம் வந்த ட்ரைவர் போய், வண்டி ஓனரான பிரபா அண்ணாவும் சேர்ந்துவிட்டதால் குஷி வேறு. சரி படம் பார்க்கப் போகலாம் என்று எல்லோரும் வானில் ஏறினார்கள். தியேட்டர் போகிற வழியில்தான் சொன்னார்கள் தாங்கள் பார்க்கப் போவது ‘ஒரு மாதிரியான' படம் என்று. அப்ப நான் ரொம்ப நல்லவன். என்னோடு என் மச்சான் நியாயத்தடி ப்ளம்ஸ் மயூரன் வேறு சேர்ந்து கொண்டான். நண்பர்களோடு ஒரு ஒப்பந்தம் போட்டோம். அவர்கள் படம் பார்த்துவிட்டு வருவதென்றும் நாங்கள் எங்கள் உறவினர் வீடொன்றுக்குச் செல்வதாயும், படம் முடிந்து வந்ததும் செல்லில் எங்களைக் கூப்பிடுமாறும் ஒப்பந்தம். (கொழும்பில் நாங்கள் தங்கிய வீட்டுச்சாவி மயூரனிடம்தான் இருந்தது). ஒப்பந்தப்படி எங்களை பம்பலப்பிட்டியவில் இறக்கிவிட்டு அவர்கள் பலான படம் பார்க்க கொழும்பு கோட்டே நோக்கிப் பயணமானார்கள்.

நானும் மயூரனும் என்னுடைய இன்னொரு மச்சானான செந்தூரன் வீட்டுக்குச் சென்றோம். செந்தூரனை செந்தண்ணா என்று அழைப்பது வழக்கம். நாங்கள் போன போது செந்தண்ணா வீட்டில் இருக்கவில்லை. ராதா அக்காவும் (செந்தண்ணாவின் மனைவி) அவர்களின் இரு அழகான குழந்தைகளும், ராதாக்காவின் தம்பி பிரகலாதனும் இருந்தார்கள். மூத்தவன் விதுரபிமன் ஒரு மோட்டார் பைக் சாவியைத் தொலைத்துவிட்டு தந்தைக்குப் பயந்து தேடிக்கொண்டிருந்தான். இளையவன் பரீட்சித் ஒரு பிஸ்கட் சாப்பிட்டுக் கொண்டிருந்தான். மயூரனாவது ஓரிரண்டு தரம் அவர்கள் வீட்டுக்குப் போயிருக்கிறான். எனக்கு அதுதான் முதல் தடவை. இருந்தும் ஒன்றரை வயதான் அந்தப் பாலன் தான் சாப்பிட்ட பிஸ்கட்டை எனது கையில் தந்தான். அப்போ குழந்தைகளின் எச்சில் சாப்பாட்டிலிருக்கும் சுவையை அறியும் பக்குவம் எனக்கிருக்கவில்லை. அந்த இரண்டு சின்னஞ் சிறுசுகளின் சிரிப்பில் மகிழ்ந்திருந்தோம். அப்போ என்று பார்த்து படம் பார்க்கப் போனவர்கள் செல்லில் அழைத்தார்கள். 'என்னடா மச்சான், போய் ஒரு மணித்தியாலம் ஆகேல்லை, அதுக்குள்ளயா' என்றோம். 'படம் சரியில்லையாமடா' என்று பதில் வந்தது. பரீட்சித்தையும், விதுவையும் விட்டு விட்டு இவங்களுக்கு சாவி கொடுப்பதற்காக பஸ் பிடித்து ஓடினோம் நானும் மயூரனும். (பரீட்சித்தை முதலும் கடைசியுமாக அன்றுதான் பார்த்தேன். இரண்டு மாதத்தின் பின் ஒரு சிறு வீட்டு விபத்தில் மூன்றடி உயர தண்ணீர்ப் பீர்ப்பாயில் தலைகுப்புற விழுந்து மூச்சுத்திணறிக்கருகியது அந்தப் பிஞ்சு. அவன் போய் 45 நாளில் செந்தண்ணாவுக்கு எமனாக ஒரு ரயில் வந்து, அந்த அழகான அன்றில் கூடு கலைந்தபோது அழுத ஒவ்வொரு கண்ணும், உண்மையாய் அழுதது)

நானும் மயூரனும் சாவியையும் கொண்டு நாங்கள் தங்கிய வீட்டை அடைந்த போது வாசலில், எங்கள் தவிர்ந்த 10 பேர், பிரபா அண்ணா ஆகியோரோடு புதிதாக ஒரு உருவம் நின்றது. அது, ஜெயன். ஜெயனைப் பற்றி வேறு பதிவுகளில் எழுதுகிறேன். அன்றைக்கு ஜெயனுக்கு நாள் சரியில்லை. ஒருவருக்கும் தெரியாமல் பலான படம் பார்த்துவிட்டு, சீன் ஒன்றும் சரியில்லை என்ற கடுப்பில் வெளியே வந்த ஜெயனை வரவேற்றது உள்ளே போவதற்காகக் காத்து நின்ற இந்த வானரக்கூட்டம். தான் பெற்ற துன்பம் எல்லாரும் பெற வேண்டும் என்று கீழ்த்தரமாக நினைக்காமல், படம் சரியில்லை என்று இவர்களைத் திருப்பிக் கூட்டிவந்திருக்கிறான் ஜெயன் (இதுதான் படம் பார்க்காம திரும்பினதுக்கு அவர்கள் சொன்ன காரணம்).இருந்தும் பல ‘கனவுகளோடு' படம் பார்க்கப் போன நம்ம பசங்க பாவம் தானே. எப்பிடியாவது படம் பார்த்தே ஆகவேண்டும் என்று சொல்லி, பிரபா அண்ணாவிடம் ஒரு சி.டி பிளேயர் ஒழுங்கு செய்தார்கள். ஒசாக்கி என்ற அந்த ஜப்பானியத் தயாரிப்பின் சிறப்பு என்ன தெரியுமா. தூர்தர்ஷனின் தென்மண்டல ஒளிபரப்பை பக்கத்து வீட்டுக்காரர் குடும்பத்தோடு பார்த்துக்கொண்டிருக்கும் போது, ஒரு நீலப் படத்தை உங்கள் வீட்டில் போட்டால், பக்கத்துவீட்டுக்காரரின் குடும்பம் அன்றோடு உடையும். ஏனெனில் அந்த தூர்தர்ஷன் Frequency ல் இந்த நீலப்படம் தெளிவாகத்தெரியும், ஒரு குறிப்பிட்ட Radius க்குள். அப்போ யாழ்ப்பாணத்தில் எல்லோருக்கும் கிடைத்த சானல் தூர்தர்சன், மலிவான் சி.டி.பிளேயர் ஒசாக்கி. ஒசாக்கியின் வண்டவாளம் தெரியாமல் நீலப்படம் பார்த்துப் பிடிபட்ட ‘அப்பாவிகள்' ஏராளம். கொழும்பில் தூர்தர்ஷன் தெரியாது. ஆகவே துணிந்து ஒசாக்கியை பிரபாவிடம் வாங்கி வந்தார்கள்.

இப்போ பார்ப்பதற்கு படம் வேண்டுமே. அங்கே Majestic City (M.C) என்றொரு Mall இருக்கிறது. அங்கே போய் பட சி.டி இரண்டு வாங்குவது என்று முடிவாயிற்று. அங்கே போயும் சும்மா இருந்தாங்களா பாவிகள், Crash என்றொரு விவகாரமான படத்தைத் தான் எடுத்தார்கள். எனக்கு ‘சீ' என்று போய்விட்டது. அந்த கடை காஷியர் பெண் கூட எங்களைப் பார்த்து வித்தியாசமாக சிரித்தாள். (அவள் சிங்களத்தி என்று நாங்கள் தமிழில் பேசினோம். அவள் ஒரு தமிழ் பெண் என்று கிட்டத்தட்ட ஒரு வருடத்துக்குப் பின் கொழும்பில் நான் வசித்த போது தெரிந்து கொண்டேன்) இவர்கள் படத்தைப் போட்டவுடன் நான் அங்கே ஒரு தெருவோரக் கடையில் வாங்கிய ஆனந்த விகடன், குமுதம் இரண்டையும் எடுத்துக் கொண்டு அறைக்குள் போய் விட்டேன் (நான் தான் நல்ல பிள்ளையாச்சே). வெளியே படம் பார்த்த வானரங்கள் சும்மா இருந்தாத்தானே.... படத்தை விட மோசமாக வினோத ஒலிகளை எழுப்பினார்கள். (அதற்கெல்லாம் Cheer Leader அரவிந்தன். அரவிந்தன் பற்றி ஐம்பது பதிவு எழுதலாம், அவ்வளவு Interesting Character). அந்தச் சத்தங்களைக் கேட்டபடி உறங்கிப் போனேன். காலையில் அரவிந்தன் கதை சொன்னான். செக்ஸில் போரடித்த கணவன் மனைவி, கார் விபத்துக்கள் செக்ஸ் ஈடுப்பாட்டைத் தூண்டுவது பற்றிய கதையாம். கார் அடிபட்டுக்கிடக்க, அவ்விடத்திலேயே செக்ஸ் வைத்துக் கொள்வார்களாம் இந்தத் தம்பதி. (என்னா கதை) அதை எங்கள் வானரங்கள் வாய் பிளந்து ரசிக்க, அவர்களின் வாய்ப்பிளவையும், வேறு பல அங்கங்களையும் குறிவைத்து வீடியோ வேறு எடுத்திருந்தான் அரவிந்தன். இதுக்குள் மஜிந்தன் ‘அது XXX Movie இல்லடா XX Movie' என்றான். 'XXXக்கும் XXக்கும் என்ன வித்தியாசம்' என்றேன். 'XXXஇல் ‘அந்த' உறுப்புக்களை எல்லாம் Zoom பண்ணிக் காட்டுவாங்க. இதில அப்படி காட்டமாட்டாங்க' இது வாகீசன் சொன்ன விளக்கம். என்னவோ பண்ணுங்கடா என்றுவிட்டு மறுபடியும் ஊர் சுற்றப் புறப்பட்டோம், மறுபடியும் உற்சாகமாய்.

இதை ஏன் இப்ப சொல்லணும்னு கேட்கறீங்களா? David Cronenberg இயக்கத்தில், James Spader, Holly Hunter, Elias Koteas, Deborah Kara Unger, Rosanna Arquette ஆகியோர் முக்கிய பாத்திரங்களில் நடிக்க J.G. Ballard மற்றும் David Cronenberg எழுத்தாக்கத்தில் உருவாகி 1996 ல் வெளிவந்த அந்த Crash என்ற கனேடியத் திரைப்படத்தின் DVD ஒரு கல்லூரி Friend இடம் வாங்கி இரண்டு வாரத்துக்கு முன் பார்த்தேன். இந்தப் படம் கீழ்க்காணும் விருதுகளைப் பெற்றது.

Adult Video News Awards

• Won: Best Alternative Adult Film

Cannes Film Festival

• Won: Jury Special Prize for Director David Cronenberg
• Nominated: Golden Palm Award for Director David Cronenberg

Genie Award

• Won: Best Achievement in Cinematography- Peter Suschitzky
• Won: Best Achievement in Direction, Best Adopted Screenplay- David Cronenberg
• Won: Best Achievement in Editing- Ronald Sanders
• Won: Best Achievement in Sound Editing- Tom Bjlic, David Evans, Wayne Griffin, John Laing, Andy Malcom, Dale Sheldrake, John Douglas Smith.
• Won: Golden Reel Award- David Cronenberg, Robert Lantos, Jeremy Thomas
• Nominated: Best Motion Picture- David Cronenberg
• Nominated: Best Overall Sound- Tony Van den Akker, David Lee, Dino Pigat, Lou Solakofski, Orest Sushko, Christian. T. Cooke.

Motion Picture Sound Editors

• Nominated: Golden Reel Award- Best Sound Editiong Foreign Feature films.

இந்த விருதுகளைப்பெற்ற காரணத்தால் அதை ஒரு 'உலகப்படம்' என்றோ ‘All Time Classic' என்றோ சொல்ல மாட்டேன். விஜய்க்கு டாக்டர் பட்டம் கிடைத்ததைப் போலக் கிடைத்த விருதுகளாய்க்கூட இருக்கலாம். நான் சொல்ல வந்தது, எங்கள் சமூகத்துக்கும் மேலைத்தேயச் சமூகத்துக்கும் இடையிலிருக்கும் ரசனை வித்தியாசத்தையும், மூன்று வருடங்கள் 5 மாதங்கள் 10 நாட்களில் எனது தனிப்பட்ட ரசனையில் ஏற்பட்ட இமாலய மாற்றத்தையும் பற்றியே. விருதுகள் பற்றிக்குறிப்பிட்டது நான் வெறும் நீலப் படத்தைப் பார்த்து அனற்றவில்லை என்பதைக் காட்டவே. முடிவாக ஒரு விஷயம் 'கனடா வரமுன்னம் நான் ரொம்ப நல்ல பிள்ளைங்கோ...' (என்னங்க அப்படிப் பாக்கிறீங்க? நிசம்மா நான் நல்ல பிள்ளைங்கோ)

படம் பாக்கணுமா? DVD Rip Links இதோ: Link-1 Link-2