வேட்டைக்காரனும் சில வலிகளும்

1.
இப்போது வலையுலகில் சூடாகப் பேசப்பட்டுக்கொண்டிருக்கிற 'தமிழீழம் காண' புதிய வழி இதுதான். ‘வேட்டைக்காரனைப் புறக்கணிப்போம்'.

அப்பர் அடிக்கடி ஒரு வாய்வார்த்தை சொல்லுவார். 'அழுவார் அழுவாரெல்லாம் தன் கவலை, திருவன் பெண்டிலுக்கு அழ ஆளில்லை' என்று. அப்படியாகிவிட்டது ‘தமிழ் உணர்வாளர்கள்' நிலமை.

இந்தப் படத்தைப் புறக்கணிக்கவேண்டுமா இல்லையா என்பதெல்லாம் எனக்கு முக்கியமில்லை. ஆனாலும் ஈழப் பிரச்சினையோடான தேவையில்லாத தொடர்புபடுத்தலாகவே இந்தப் புதிய புறக்கணிப்பைப் பார்க்கக்கூடியதாக இருக்கிறது. அதைவிட முக்கியமாக facebook ல் வேலையில்லாமல் இருக்கும் ஒரு தனிநபர் அல்லது ஒரு குழுவின் விசமமாகவே இதைக் கருதவேண்டியதாய் உள்ளது. ஆயிரத்துக்குமேல் நண்பர்களைச் சேர்த்த வினை ஒரு நாளைக்கு ஒன்றுக்கு மேற்பட்ட இடங்களிலிருந்து ‘வேட்டைக்காரனைப் புறக்கணிப்போம்' என்றும், அதற்குக் கொஞ்சமும் சளைக்காத விகிதத்தில் இந்தப் ‘புறக்கணிப்பைப் புறக்கணிப்போம்' என்கிற மாதிரியும் facebook pages அழைப்புகள் வந்தவண்ணம் இருக்கின்றன. அந்தக் கடுப்பில் எழுத உட்கார்ந்தாயிற்று.

2.
கொஞ்சக் காலத்துக்கு முன்னர்தான் அஜித்தின் ஏகனை புலம்பெயர் தமிழ் மக்களால் நடாத்தப்படுகிற திரையரங்குகளில் புறக்கணிப்போம் என்று ஒரு கோஷம் எழுந்ததாக ஞாபகம். Facebook முழுவதும் ‘ஏகனைப் புறக்கணிப்போம்' என்று தனுஷின் உடம்புக்கு அஜித்தை ஒட்டிக் கதறினார்கள். பின்னர் அஜித் சும்மா ஒரு இரண்டு வார்த்த பேசியதும் ஏகனைப் புறக்கணித்தல் புறக்கணிக்கப்பட்டது. இந்த முறை விஜய் காங்கிரஸ் கட்சியோடு சேரப்போவதாய் வந்த செய்திகளுடன், இராஜ் வீரரட்ன என்கிற சிங்களவரோடு சேர்ந்து விஜய் அன்ரனி பணியாற்றினார் என்கிற காரணத்தையும் சேர்த்து வேட்டைக்காரனைப் புறக்கணிக்க வேண்டும் என்கிறார்கள்.

இந்தப் புறக்கணிப்பு சம்பந்தமான சர்ச்சையைச் சற்றே உற்றுப்பார்த்தால் தெரியும். இது ஒன்றும் ஈழ மக்கள் சார்பான சர்ச்சை அல்ல. விஜய் ரசிகர்கள், அவர்களின் எதிரிகள் விளையாடுவதற்கு ஈழ மக்களின் அவலத்தைப் பந்தாக உருட்டுகிறார்கள், அவ்வளவுதான். வேட்டைக்காரனைப் புறக்கணிப்பதால் எல்லாப் பிரச்சினையும் தீர்ந்துவிடப்போவதுமில்லை, புறக்கணிக்காமல் விடுவதால் நிலமை இன்னும் மோசமாகிவிடப்போவதில்லை. இது சமீபகாலமாக நிலவிவருகிற மோசமான ஒரு பற்று (fad). ஏதாவது புதுப்படம் வந்தால் அதற்குரிய சர்ச்சைகளும் கூடவே வருவது இப்போது அவசியமாகியிருக்கிறது. தம் இருப்பைக் காட்டிக்கொள்ள கிருஷ்ணசாமி, திருமாவளவன், இராமதாசு ஆகியோர் ஆரம்பித்த இந்தப் பற்று இப்போது நம்மவர்களைத் தொற்றிக்கொண்டு ஆட்டிவைக்கிறது என்றே சொல்வேன்.

3.
விஜய், விஜய் அன்ரனி ஆகிய இருவரும் இன்னொரு நாட்டவர்கள். அவர்களுக்கும் ஈழவர்களுக்கும் சம்பந்தம் எதுவுமில்லை. முன்பு தொப்பூள்கொடி உறவு இருந்ததாகக் கேள்வி. ஆனால் தெலுங்கானா மாநிலத்துக்கான அறிவிப்புடன் அந்தத் தொப்பூள்கொடி கொடூரமான முறையில் கூர் மங்கிப்போன, கறள்பிடித்த இறையாண்மை என்னும் கத்தியால் வெட்டியறுக்கப்பட்டு விட்டது. ஆகையால் அவர்கள் இனிமேலும் எங்கள் நலன்களை மனதில் வைத்துச் செயற்பட வேண்டும் என்று எதிர்பார்ப்பது அடிமுட்டாள்தனம். வேற்று மொழிகளில் உருவாகிற திரைப்படங்களைக் கண்டுமகிழும் அதே மனநிலையில் அவர்களின் படங்களைக் கண்டுமகிழ வேண்டியதுதான். விஜய் மட்டுமல்ல, இனிமேலும் எந்த ஒரு நாட்டைச்சேர்ந்த அரசியல் பிரமுகரையோ, அல்லது பிரபலத்தையோ அவ்வாறு எதிர்பார்ப்பது தவறு.

இதையும் இங்கே பதிந்துவைக்க விரும்புகிறேன். வேட்டைக்காரன் படத்தைப் பார்ப்பதும், பார்க்காமல் விடுவதும் எங்கள் கையில்தான் இருக்கிறது. படத்தைப் பார்க்க வரும்படி எந்த நடிகனோ, தயாரிப்பாளனோ உங்களையும் என்னையும் வெற்றிலை, பாக்கு வைத்து அழைக்கப்போவதில்லை. வேட்டைக்காரனைப் புறக்கணிக்கும்படி விஜயையும், விஜய் அன்ரனியையும் தாக்கித் துண்டுப்பிரசுரம் அடிக்க உங்களுக்கு எவ்வளவு உரிமை இருக்கிறதோ, அந்தளவு உரிமை காங்கிரசில் சேர விஜய்க்கும், இராஜ் வீரரட்னேயுடன் பணியாற்ற விஜய் அன்ரனிக்கும் உரிமை இருக்கிறது. அவ்வளவுதான் விஷயமே. மற்றபடி, தயவுசெய்து ஈழவர் பிரச்சினையை இப்படியெல்லாம் சில்லறைத்தனமாகப் பயன்படுத்தாதீர்கள். வலிக்கிறது.

4.
சயந்தன் சமீபத்தில் twitter ல் ஒரு நக்கல் அடித்திருந்தார். ‘நாங்க சிவாஜியைப் புறக்கணிச்சிட்டு இண்டர்நெட்டில இறக்கிப் பாக்கிறனாங்களாகும்' என்று அவர் நக்கலுக்காகவே சொல்லியிருந்தாலும், சுருக்கென்று தைக்கிற உண்மை, ‘எங்கள் புறக்கணிப்பும், ரோசமும் வெறும் வாய்ப்பேச்சோடு மட்டும்தான்' என்பதே.